سنڌسماءَچار
Related Articles
لاهور(سنڌسماءَچار مانيٽرنگ ڊيسڪ) گهڻا ججز فيصلا ته لکندا آهن پر انهن کي انگريزي نه ايندي آهي، عدالتن ۾ قومي ٻولي پڙهي ۽ لکي وڃي جيئن سڀني کي دليل، قانوني ۽ آئيني وضاحتون ۽ فيصلا سمجهه ۾ اچي سگهن. اهو چوڻ آهي پاڪستان جي اڳوڻي چيف جسٽس رٽائرڊ جواد ايس خواجا جو. جسٽس (ر) جواد خواجا هڪ انٽرويو ۾ چيو آهي ته، ڪيترائي جج صاحب فيصلا انگريزي ۾ لکندا آهن پر هنن کي انگريزي ناهي ايندي. سپريم ڪورٽ جو اڳوڻو چيف جسٽس پاڪستان جواد ايس خواجا رٽائرمينٽ کانپوءِ لاهور جي بيديان روڊ تي ٽيٺر ڳوٺ جي ان اسڪول ۾ پڙهائي رهيو آهي، جنهن ۾ سندس گهرواري پهريان ئي پڙهائي رهي آهي. ان اسڪول ۾ سندس گهرواري به ٻارن کي پڙهائيندي آهي ۽ سندس ڏوهٽا ۽ ڏوهٽيون به ان ئي اسڪول ۾ تعليم حاصل ڪري رهيون آهن. انٽرويو ۾ جسٽس ريٽائرڊ جواد ايس خواجا چيو ته عدالتن ۾ قومي ٻولي لکي ۽ ڳالهائي وڃي ته جوابدارن کي خبر پئجي سگهي ته عدالت ۾ سندن بابت ڪهڙيون ڳالهيون ٿي رهيون آهن. هن چيو ته جج آئين جي پاسداري جو حلف کڻندا آهن، آئين ۾ ته ذڪر ئي قومي ۽ صوبائي ٻولين جو آهي، اردو کي قومي ٻولي قرار ڏنو ويو آهي. جواد ايس خواجا چيو ته جڏهن آئين اجازت ناهي ڏيندو ته جج صاحب انگريزي ۾ فيصلو ڇو لکندا آهن.
جواد ايس خواجا پنهنجي انٽرويو ۾ وڌيڪ چيو آهي ته ڪجهه عدالتن ۾ اردو جي جاءِ تي انگريزي ٻولي استعمال ٿيندي آهي، جوابدارن کي ته خبر ئي ناهي پوندي ته وڪيل ۽ جج هنن بابت ڇا ڳالهائي رهيا آهن. ڪجهه جج انگريزي ۾ فيصلا لکندا آهن پر انهن کي انگريزي ناهي ايندي. تعليمي پاليسي جي حوالي سان جواد ايس خواجا چيو ته پاڪستان ۾ بي شمار ڪميشن بڻيا. حڪومت پاڻ ڏسي ته ڇو ڪري رهيا آهن. هن چيو ته جيڪڏهن تعليم ڪنهن کي انسان نٿي بڻائي ته اُها تعليم ناهي.
