سنڌسماءَچار
Related Articles
راڻيپور (رپورٽر سنڌسماءَچار) حضرت سچل سرمست جي گادي نشين خواجا عبدالحق ڪئنال خلاف تحريڪ جي حمايت ڪندي چيو آهي ته سنڌ کي ٻيو بلوچستان نه بڻايو، ڪجهه به ڪرڻو پيو ته ڪنداسين پر ڪئنال قبول نه ڪنداسين، سنڌو درياءَ مان نوان ڪئنال اسان جي رت تي ٺهندا، اسٽبلشمينٽ کي ڪنهن حق ڏنو آهي ته اها سنڌ کي سڪائي گرين پاڪستان انيشيٽو لاءِ ڪئنال ڪڍي. خواجا عبدالحق راڻيپور ۾ پريس ڪانفرنس ڪندي چيو آهي ته، سنڌو درياءَ تي سنڌ جو حق آهي، سنڌ کي سڪائي نوان ڪئنال نه ٿا ڪڍي سگهجن، سنڌو درياءَ مان تڪراري ڪئنال اسان جي رت تي ٺهندا. خواجا عبدالحق جو چوڻ هو ته هن پاڻ چولستان وارو علائقي ڏٺو آهي، اتي ڪئنال ڪڍي ان کي آباد ڪرڻ جي اجازت نه ٿي ڏئي سگهجي، اوهان کي پاڻي گڏ ڪرڻو آهي ته کارو ڇاڻ ۾ وڃي گڏ ڪيو، انڊس ڊيلٽا کي سرسبز ڪيو وڃي ته سامونڊي طوفانن ۽ انساني تباهڪارين کان بچي سگهجي ٿو. سڇل سرمست جي گادي نشين جو چوڻ هو ته، اسٽبلشمينٽ کي ڪنهن اجازت ڏني آهي ته اها پاڻمرادو فيصلا ڪري گرين پاڪستان انيشيٽو پروگرام شروع ڪري ۽ سنڌ جو پاڻي کنيو وڃي، اوهان کي اکيون کولڻ گهرجن ڇو ته اڄ بلوچستان جنهن صورتحال مان گذري رهيو آهي اها ائين هئي جو انهن جي ڳالهه نه ٻڌي وئي ۽ اڄ سنڌ ۾ به ائين پيو ٿئي، مان چوان ٿو ته سنڌ کي ٻيو بلوچستان نه بڻايو، ڪئنال اسان جي رت تي ٺهندا، ڀٽائي، سچل ۽ سامي جي ڌرتي سرسبز ۽ زرخيز آهي ۽ رهندي، ان کي سڪائڻ جي ڪوشش نه ڪئي وڃي. هن چيو ته چار اپريل تي پيپلزپارٽي ڳڙهي خدابخش ۾ ڪو وڏو اعلان به ڪري سگهي ٿي، ڪئنالن خلاف تحريڪ منصوبو رد ٿيڻ تائين جاري رھڻ گھرجي، مان ان جي حمايت ڪيان ٿو، ڪجهه به ڪرڻو پيو ته ڪنداسين پر ڪئنال قبول نه ڪنداسين.
