سنڌسماءَچار
Related Articles
گمبٽ ( خاص نمائندو سنڌسماءَچار) زين شاهه، راشد محمود سومرو ۽ سيد اسماعيل شاهه جي اڳواڻي ۾ ڪئنالن خلاف ريلي، ابل واهه کان 5ڪلوميٽر ريلي ڪڍي سنڌ سمال انڊسٽريز جي گيٽ وٽ ڌرڻو هنيو ويو، ريلي ۾ وڏي انگ ۾ ڪارڪنن جي شرڪت،ڪئنال سمورا نامنظور، سنڌو تي ڌاڙو نامنظور جا اڀ ڏاريندڙ نعرا، ريلي ۾ ٻارڙن به وڏي انگ ۾ شرڪت ڪئي. ڌرڻي کي خطاب ڪندي سيد زين شاهه چيو ته سنڌو جي مالڪي لاءِ سموري سنڌ جاڳي پئي آهي، اڄ جو احتجاج ثابت ڪري ٿو ته سنڌوءَ تي قبضو ۽ ڪو به ڌاڙو منظور ناهي، سنڌو درياءَ مان نڪرندڙ ڪئنال اڌ کان وڌيڪ ٺهي چڪا آهن، گيٽ به تيار آهن. حڪومت ڪئنالن واري منصوبي جو فيصلو واپس وٺي.
ڌرڻي کي خطاب ڪندي فنڪشنل ليگ ۽ جي ڊي اي جي اڳواڻ سيد اسماعيل شاهه راشدي چيو ته اسان سورهيه بادشاهه جي اولاد آهيون، سنڌ لاءِ خون جو نذرانو ڏينداسين، سنڌو مان 6 نوان ڪئنال ڪڍڻ سنڌ کي سڪائڻ جي رٿا آهي، سنڌ ڪئنالن وارو منصوبو رد ڪري ڇڏيو آهي.
راشد محمود سومرو چيو ته، شهيد خالد محمود سومرو 20 سال اڳ چيو هو ته هي قرآن کڻي به چون ته ڪئنال نه ڪڍنداسين تڏهن به هنن تي اعتبار ناهي ۽ هي هر صورت ۾ ڪئنال ڪڍندا، جيڪا ڳالهه اڄ سچ ثابت ٿي رهي آهي، هن چيو ته اسان سنڌ، سنڌو درياءَ ۽ سنڌ حقن جي حفاظت ڪنداسين.
