سنڌسماءَچار
Related Articles
وڏي وزير سيد مراد علي شاهه قلندر شهباز جي درگاهه تي ٿيل بم ڌماڪي جي مذمت ڪندي چيو آهي ته درگاهه تي بم حملي بابت اڳواٽ ڪو به اطلاع نه هو، پهرين ترجيح زخمين کي علاج جي سهولت فراهم ڪرڻ آهي، امدادي ڪاررواين کي تيز ڪرڻ لاءِ پاڪ آرمي کان به مدد ورتي پئي وڃي. ڪي ٽي اين نيوز سان ڳالهائيندي وڏي وزير مراد علي شاهه جو چوڻ هو ته سيوهڻ ڌماڪي کانپوءِ سنڌ جي ٻين درگاهن جي به سيڪيورٽي سخت ڪئي وئي آهي ۽ سمورين اسپتالن ۾ ايمرجنسي لاڳو ڪئي وئي آهي. وڏي وزير چيو ته ريسڪيو ڪارروائين لاءِ آرمي کان مدد ورتي پئي وڃي، جڏهن ته پاڪ آرمي کان اونڌهه ۾ اڏام ڪندڙ هيلي ڪاپٽر پڻ ورتا ويا آهن، جن وسيلي زخمين کي مختلف اسپتالن ڏانهن منتقل ڪيو پيو وڃي. وڏي وزير وڌيڪ چيو ته سيوهڻ ڌماڪي بعد پوليس کي سنڌ ۾ سيڪيورٽي هاءِ الرٽ ڪرڻ جي هدايت ڪئي وئي آهي………. پاڪ فوج سيوهڻ ڌماڪي جي زخمين کي مختلف اسپتالن ڏانهن منتقل ڪرڻ لاءِ ريسڪيو آپريشن شروع ڪري ڇڏيو آهي، پاڪ فوج جي ترجمان جو چوڻ آهي ته اسان پنهنجي ملڪ جو دفاع ۽ جوابي ڪارروائي ڪنداسين. آءِ ايس پي آر موجب سيوهڻ ۾ درگاهه قلندر ۾ ٿيل ڌماڪي جي زخمين کي طبي امداد فراهم ڪرڻ لاءِ پاڪ فوج جي ٽيمن پاران ريسڪيو آپريشن شروع ڪيو ويو آهي. آءِ ايس پي آر موجب پاڪ فوج جي اونداه ۾ اڏام ڪندڙ هيلي ڪاپٽرن وسيلي ڌماڪي جي زخمين کي مختلف شهرن جي اسپتالن ڏانهن منتقل ڪيو پيو وڃي. پاڪ فوج جي ترجمان جو چوڻ آهي ته دهشتگردي جا تازا واقعا دشمن قوتن ۽ افغانستان ۾ موجود دهشتگردن پاران ڪرايا پيا وڃن. ترجمان موجب پاڪ فوج پنهنجي ملڪ جو دفاع ڪندي ۽ ڀرپور جوابي ڪارروائي ڪندي.
