سنڌسماءَچار
Related Articles
ڪراچي ( رپورٽ: آفاق ڀٽي سنڌسماءَچار) سنڌ ۾پاڻي جي بدترين کوٽ ۽ 62 سيڪڙو گهٽ مينهن وسڻ جي نتيجي ۾ سنڌ ۾ ڏڪار جو الرٽ جاري، موسميات کاتي ڪراچي، حيدرآباد، خيرپور، سانگهڙ، گهوٽڪي ۽ سکر سميت سنڌ جي 15 ضلعن ۾ پاڻي جي کوٽ ۽ برساتون نه پوڻ سبب ڏڪار جو الرٽ جاري ڪري ڇڏيو آهي.
موسميات کاتي پاران جاري ڪيل الرٽ ۾ چيو ويو آهي ته پاڻي جي بدترين کوٽ کي منهن ڏيندڙ سنڌ ۾ ڏڪار واري صورتحال آهي، معمول کان 62سيڪڙو گهٽ برساتون پوڻ جي نتيجي ۾ ڪراچي، حيدرآباد، ٺٽو، بدين، عمرڪوٽ، گهوٽڪي، سکر ۾ ڏڪار جي صورتحال آهي، الرٽ موجب لاڙڪاڻو، نوشهروفيروز، جيڪب آباد، سانگهڙ، شهيد بينظيرآباد ۽ جيڪب آباد سميت سنڌ جي 15ضلعن ۾ ڏڪار واري صورتحال آهي. موسميات کاتي موجب پهرين سيپٽمبر 2024 کان 21 مارچ 2025 تائين معمول کان 40 سيڪڙو گهٽ مينهن وسيا، ان عرصي دوران سنڌ ۾ معمول کان 62 سيڪڙو ۽ بلوچستان ۾ معمول کان 52 سيڪڙو گهٽ برساتون رڪارڊ ڪيون ويون آهن. موسميات کاتي موجب پنجاب ۾ معمول کان 38 سيڪڙو، ڪي پي ۾ 35 سيڪڙو ۽ آزاد ڪشمير ۾ معمول کان 29 سيڪڙو گهٽ برسات رڪارڊ ڪئي وئي آهي.
موسميات کاتي موجب هن وقت سنڌ ۽ بلوچستان جي ڏکڻ وارن علائقن ۽ پنجاب جي اوڀر وارن علائقن ۾ ڏڪار واري صورتحال برقرار آهي، برسات نه پئي ته حالتون وڌيڪ خراب ٿي سگهن ٿيون.
