سنڌسماءَچار
Related Articles
انصاف واري عالمي عدالت ڀارتي درخواست تي جاسوس ڪلڀوشن ياديو جي ڦاهي واري فيصلي تي عملدرآمد روڪي ڇڏيو، ڀارت کي قونصلر رسائي ڏيڻ جي هدايت، عدالت چيو آهي ته معاملو فوري اهميت واروآهي ڀارت ۽ پاڪستان پنهنجي موقف جي حق ۾ وڌيڪ ثبوت پيش ڪن، عدالت ٻڌڻي جي اختيار کي چيلينج ڪرڻ وارو پاڪستاني موقف رد ڪندي چيو ته ٻئي ملڪ ويانا ڪنويشن تي صحيحون ڪندڙ آهن ۽ عدالت ڪيس جي ٻڌڻي ڪرڻ جو اختيار رکي ٿي.
هيگ ۾ انصاف واري عالمي عدالت ڪلڀوشن ياديو جي ڦاهي خلاف ڀارت جي درخواست تي فيصلو ٻڌايو، جج روني ابراهيم چيو ته پاڪستان ۽ ڀارت ويانا ڪنوينشن تي صحيحون ڪندڙ ملڪ آهن، تنهن ڪري عالمي عدالت جي اختيارن بابت پاڪستان جا اعتراض درست ناهن. آءِ سي جي ڪلڀوشن ياديو کي سزا ٻڌائڻ واري فيصلي تي ڀارتي اعتراض درست ناهن، پاڪستان جي قانون موجب اتان جي فوجي عدالت ڪنهن کي به ڏوهه ثابت ٿيڻ تي سزا ڏئي سگهي ٿي. عدالت ڪلڀوشن ياديو جي ڦاهي واري فيصلي تي عملدرآمد روڪڻ جي هدايت ڏيندي چيو ته جيستائين عدالت فيصلو نه ٿي ٻڌائي تيستائين ڦاهي واري فيصلي تي عمل نه ڪيو وڃي.
جج روني ابراهم چيو ته هن معاملي جو مختلف رخن کان جائزو وٺندي، پاڪستان ۽ ڀارت پنهنجو موقف ۽ ثبوت تفصيل سان پيش ڪن. عدالت ويانا ڪنوينشن جي آرٽيڪل 36 جي پيرا اَي تحت ڀارت کي ڪلڀوشن تائين قونصلر رسائي ڏيڻ سان گڏ ساڻس ملاقات تي پابندي ختم ڪرڻ جي به هدايت ڪئي.
پاڪستان انٽر نيشنل ڪورٽ آف جسٽس جو فيصلو قبولڻ کان جواب ڏئي ڇڏيو
پاڪستان جي پرڏيهي وزارت جي ترجمان چيو آهي ته عالمي عدالت جي اختيارن کي نٿا مڃون، پاڪستان جي قانوني ماهرن پنهنجو موقف جمع ڪرائي ڇڏيو آهي، ڀارت ڪلڀوشن جي ساٿين تائين رسائي ڏي. ڪلڀوشن ياديو جي ڪيس بابت عالمي عدالت جي آيل فيصلي تي رد عمل ظاهر ڪندي پرڏيهي ترجمان نفيس زڪريا جو چوڻ هو ته عالمي عدالت جي اختيارن کي تسليم نٿا ڪريون. اسان جي قانوني ماهرن انصاف جي عالمي عدالت جي دائره ڪار بابت پنهنجو موقف جمع ڪرائي ڇڏيو آهي.
پرڏيهي ترجمان موجب ڀارت کي ڪلڀوشن ياديو جي ساٿين تائين پهچ لاءِ چيو هو، پر ڀارت اها رسائي نه پيو ڏي، جڏهن ته ٻنهي ملڪن وچ ۾ قونصلرز ۾ رابطي وارو معاهدو موجود آهي. پرڏيهي ترجمان جو چوڻ هو ته ماضي ۾ انصاف واري عالمي عدالت 3 ڀيرا اهڙا فيصلا ڏنا آهن، جيڪي آمريڪا خلاف هئا.
ڪلڀوشن جي ڦاسي تي عمل روڪڻ وڏي ڳالهه ناهي، حتمي فيصلو نه آيو آهي: سرتاج عزيز
پرڏيهي معاملن بابت وزيراعظم جي صلاحڪار سرتاج عزيز چيو آهي ته انصاف جي عالمي عدالت پاران عبوري فيصلي تي اسٽي جاري ڪرڻ وڏي ڳالهه نه آهي، عدالت رڳو حتمي فيصلي تائين ڪلڀوشن کي ڦاهي تي عمل کان روڪيو آهي. سرتاج عزيز آءِ سي جي فيصلي بابت چيو ته اسان جو موقف آهي ته سڪيورٽي سبب اهم آهن، عبوري فيصلي تي قونصلرز جي پهچ تي رڳو راءِ ڏني آهي، عالمي عدالت جي فيصلي تي اسٽي جاري ڪرڻ ڪا وڏي ڳالهه نه آهي. هن چيو ته عالمي عدالت جي فيصلي کانپوءِ وڪيلن جي نئين ٽيم جوڙينداسين، جيڪڏهن پنهنجي ٽيم نه موڪليون ها ته فيصلو هڪ طرفو اچي ها.
گڏيل قومن جي اجلاس ۾ ڪلڀوشن جو نالو ئي نه ورتو ويو، اسان جي حڪومت عالمي عدالت ۾ کٽيل ڪيس هارايو: شيري رحمان
پ پ جي مرڪزي اڳواڻ شيري رحمان چيو آهي ته گڏيل قومن جي جنرل اسيمبلي ۾ ڪلڀوشن جو نالو نه ورتو ويو، اسان جي حڪومت عالمي عدالت ۾ کٽيل ڪيس هارايو آهي. اسلام آباد ۾ ميڊيا سان ڳالهائيندي شيري رحمان چيو ته پاڪستان جو ڪيس مضبوط هو پر حڪومت پاران قدم نه کڻڻ سبب اهڙو فيصلو آيو آهي.
شيري رحمان چيو ته ڪلڀوشن تخريبڪار هو جنهن کي پاڪستان جي سرزمين تان پڪڙيو ويو، اسان ڀارت سان امن چاهيون ٿا پر پاڪستان جي قيمت تي نه، ڪلڀوشن ڪيس بابت ڪا تياري نه ڪئي وئي هئي، اسان کي 10 مئي تائين ايڊ هاڪ جج مقرر ڪرڻ گهرجي ها، ڀارت عالمي عدالت ۾ پنهنجو جج مقرر ڪيو هو. شيري رحمان چيو ته اسان ملڪ جو وقار مجروع ٿيڻ نه ڏينداسين، ان بابت قومي سلامتي ڪميٽي جو اجلاس جلد کان جلد گهرايو وڃي.
