سنڌسماءَچار
Related Articles
شاباش آصف زرداري، خورشيد شاھ ۽ مراد علي شاھ، سنڌ تي حڪمراني ڪندڙ پاڪستان پيپلز پارٽي جي شاندار حڪومت جو هڪ عاليشان مثال سکر ۾ ڏسڻ لاءِ مليو آهي، جتي سول اسپتال جي عملي پاران هڪ غريب عورت جو علاج ڪرڻ بدران کيس ساڳئي اسپتال جي ڊاڪٽر جي خانگي اسپتال کڻي وڃڻ جو مشورو ڏئي واپس روانو ڪري ڇڏيو.
سکر جي هڪ ڳوٺ مان هڪ عورت کي جڏهن وارثن سول اسپتال سکر پهچايو ته اسپتال جي عملي عورت مسمات حاڪم زادي بروهي جو علاج ڪرڻ کان ٺپ جواب ڏئي ڇڏيو. مسمات حاڪم زادي بروهي سان گڏ هڪ وارث علي احمد بروهي مقامي صحافي کي ٻڌايو ته، حاڪم زادي کي اوچتو ڳلي ۾ سور پيو، جنهن کي سرڪاري سول اسپتال علاج لاءِ آندو. هن ٻڌايو ته هوو انتهائي غريب آهي، انڪري پنهنجي عورت جو علاج خانگي اسپتال ۾ ڪرائڻ جي سگھ بلڪل نه آهي، انڪري ئي سرڪاري اسپتال آيا.
علي احمد بروهي چيو ته هُو جڏهن حاڪم زادي کي کڻي سول اسپتال پهتا ته اتي موجود عملي جي ماڻهن کيس ٻڌايو ته، اوهان جي عورت جو علاج ڪرڻ وارو ڊاڪٽر 6 ڪلاڪن کانپوءِ ايندو ۽ ان ئي ڊاڪٽر جي خانگي اسپتال به آهي اوهان اتي وڃي علاج ڪرايو ته بهتر ٿيندو
مسمات حاڪم زادي بروهي سان گڏ آيل سندس وارث ميڊيا کي ٻڌايو ته، هن وٽ ايمبولينس ڪرائڻ جا به ڏوڪڙ نه هئا ۽ انڪري حاڪم زادي کي گڏھ گاڏي تي اسپتال کڻي آيو، هُو 6 ڪلاڪن تائين شهر ۾ رلندا رهيا ته ڪنهن ٻي سرڪاري اسپتال وڃي، ڇوم ته وٽس خانگي اسپتال ۾ علاج ڪرائڻ جي سگھ نه آهي انڪري هُو حاڪم زادي جو علاج ڪرائڻ کانسواءِ ئي واپس ڳوٺ وڃي رهيو آهي.
