سنڌسماءَچار
Related Articles
اسلام آباد(خاص نمائندو سنڌسماءَچار) وڏي عرصي کان پيپلز پارٽي ۽ نون ليگ ۾ هلندڙ تڪرار وارو ماحول گڏيل مخالف ڌر جي اتحاد طرف وڌڻ لڳو آحي، سومر ڏينهن قومي اسيمبلي جي اجلاس کان اڳ آصف زرداري ۽ شهباز شريف اپوزيشن ليڊر جي چئمبر ۾ ملاقات ڪئي، ملاقات بعد ٻئي ڄڻا گڏجي قومي اسيمبلي جي اجلاس ۾ شريڪ ٿيا، شهباز شريف ۽ آصف زرداري جيئن ئي ايوان ۾ داخل ٿيا ته ٻنهي پارٽين جي ميمبرن ڊيسڪ وڄائي سندن آڌر ڀاءُ ڪيو. ذريعن جو چوڻ آهي ته آصف زرداري ۽ بلاول جي يو آءِ پاران سڀاڻي اربع تي ٿيندڙ اي پي سي ۾ به شرڪت ڪندا. عام چونڊن کان پوءِ پيپلز پارٽي ۽ نون ليگ وچ ۾ سياسي لاڳاپن تي ڄميل برف پگهرجڻ شروع ٿي وئي آهي. قومي اسيمبلي جي اجلاس شروع ٿيڻ کان اڳ پارليامينٽ ۾ اپوزيشن ليڊر شهباز شريف جي چئمبر ۾ اڳوڻي صدر آصف زرداري شهباز شريف وٽ وڃي ساڻس ملاقات ڪئي. ن ليگ جي ذريعن جو چوڻ آهي ته ن ليگ ۽ پ پ جي سينئر اڳواڻن آصف ۽ شهباز شريف وچ ۾ ملاقات جو بندوبست ڪيو، جنهن لاءِ آصف زرداري کي پ پ جي هڪ سينئر اڳواڻ راضي ڪيو. ذريعن اها به دعويٰ ڪئي آهي ته، 31 هين آڪٽوبر اربع ڏينهن (سڀاڻي) جي يو آءِ پاران سڏايل آل پارٽيز ڪانفرنس ۾ به پيپلز پارٽي جو چيئرمين بلاول ڀٽو زرداري ۽ ڪو چيئرمين آصف زرداري پارٽي اڳواڻن سان گڏ شرڪت ڪندا. ان سلسلي ۾ پ پ جي هڪ سينئر اڳواڻ جو چوڻ آهي ته، ملاقات دوران آصف زرداري شهباز شريف کي ان شرط تي اي پي سسي ۾ شرڪت جي پڪ ڏياري آهي ته جيڪڏهن نواز شريف پاڻ اي پي سي ۾ ايندو ته پوءِ هُو به بلاول ڀٽو زرداري سان گڏ شرڪت ڪندو، جيڪڏهن نواز شريف نه آيو ته پوءِ پ پ پ جا سينئر اڳواڻ وفد جي صورت ۾ اي پي سي ۾ شريڪ ٿيندا.
