سنڌسماءَچار
Related Articles
اسلام آباد: سينيٽ آف پاڪستان جي تعليم ۽ پيشيواراڻي تربيت بابت اسٽينڊنگ ڪميٽيءَ قومي اسيمبلي مان منظور ٿيل قرآن پاڪ ناظره ۽ ترجمي سان گڏ لازمي پڙهائڻ وارو بل 2017ع منظور ڪري ڇڏيو آهي آهي، بل اسلام آباد ۽ وفاق جي انتظامن هيٺ اسڪولن تي لاڳو هوندو. قومي اسيمبلي ۽ بعد ۾ سينيٽ ڪميٽي پاران منظور ڪيل بل مطابق هر مسلمان شاگرد ۽ شاگردياڻي لازمي هوندو ته، پهرين کان پنجين درجي تائين ناظره قرآن ۽ ڇهين ڪلاس کان ٻارهين ڪلاس تائين قرآن پاڪ آسان ترجمي سان پڙهڻ لازمي هوندو. قرآن پاڪ ناظره ۽ ترجمي سان گڏ لازمي پڙهائڻ وارو بل 2017ع غيرمسلم شاگردن ۽ شاگردياڻين تي لاڳو هوندونه ٿيندو. غيرمسلم پاڪستاني شاگرد اخلاقيات جو مضمون پڙهندا. بل سرڪاري توڙي خانگي تعليمي ادارن ۾ پڙهندڙ سمورن مسلمان شاگردن ۽ شاگردياڻين تي لاڳو هوندو. مملڪتي وزير انجنيئر بليغ الرحمان چيو ته قرآن پاڪ آسان ترجمي سان دينيات جي پيرڊ ۾ پڙهايو ويندو. 7 سالن ۾ شاگرد پوري قرآن پاڪ کي سمجهي وٺندا. هن چيو ته آئين ۾ وضاحت سان لکيل آهي ته قرآن ڪريم جي تعليم رياست جي ذميواري آهي، اسان آئيني ۽ مذهبي فرض ادا ڪندي آئيني گهرج پوري ڪئي آهي، بل جا مقصد سادا رکيا ويا آهن، اهو بل اسلام آباد ۽ وفاق جي انتظام هيٺ اسڪولن تائين محدود رهندو ۽ سمورا صوبا به ان قانون کي لاڳو ڪرڻ تي راضي آهن.
