سنڌسماءَچار
Related Articles
ڪراچي ( سنڌسماءَچار نيوز) تعليم کاتي اين ٽي ايس، سنڌ يونيورسٽي ۽ آءِ بي اي سکر جي ٽيسٽ پاس ڪيل ڪانٽريڪٽي استادن کي پڪو ڪرڻ لاءِ قانوني رڪاوٽون ختم ڪرڻ جو فيصلو ڪري ڇڏيو آهي. ان سلسلي ۾ تعليم کاتي قانون واري کاتي کي قانون سازي ڪري سنڌ اسيمبلي مان منظور ڪرائڻ لاءِ خط لکيو آهي. تعليم کاتي پاران قانون واري کاتي کي لکيل خط ۾ واضع طور چيوويو آهي ته، اين ٽي ايس، سنڌ يونيورسٽي ۽ آءِ بي اي سکر جي ٽيسٽ پاس ڪيل استادن کي مستقل ڪرڻ لاءِ سنڌ ڪابينا منظوري ڏئي ڇڏي آهي، جنهن بعد وڏي وزير به ان جي منظوري ڏني آهي. خط ۾ چيو ويو آهي ته، ڪانٽريڪٽي استادن کي قانوني مونجهارا آهن انڪري نئين سر قانون سازي ڪرڻي پوندي. خط مطابق قانون واري کاتي کي چيو ويو آهي ته، استادن کي پڪو ڪرڻ لاءِ قانوني رڪاوٽون ختم ڪرڻ خاطر سنڌ اسيمبلي مان نئين سر قانون سازي ڪرائي منظوري ورتي وڃي؛ جيئن ڪانٽريڪٽ تي مقرر استادن کي وڏي وزير ۽ سنڌ ڪابينا جي فيصلي تي عمل ڪرائي سگهجي. تعليم جي وزارت لکيل خط ۾ ڄاڻايو آهي ته قانون جي وزارت ايڪٽ جي منظوري لاءِ سمري سنڌ اسيمبلي ڏانهن موڪلي. خط ۾ وڌيڪ ڄاڻايو ويو آهي ته سنڌ يونيورسٽي ۽ آئي بي اي ٽيسٽ پاس استادن کي پڪو ڪرڻ لاءِ قانون سازي لاءِ اسيمبلي کي سمري موڪلي. واضح رهي ته 15هزار اين ٽي ايس استادن کي مستقل ڪرڻ بابت سنڌ ڪابينا پهريان ئي منظوري ڏئي چڪي آهي. تعليم جي وزارت پنهنجي خط ۾ زور ڀريو آهي ته هن معاملي کي انتھائي اهم سمجھي اھميت ڏني وڃي.
