سنڌسماءَچار
Related Articles
ڪراچي (اسٽاف رپورٽر سنڌسماءَچار)سنڌ جي وڏي وزير سيد مراد علي شاهه جي صدارت هيٺ سنڌو درياهه جي ساڄي ڪپ تي پاڻي جي کوٽ بابت اجلاس ٿيو. اجلاس ۾ آبپاشي وزير ڄام خان شورو، سنڌ جي وڏي وزير جو سيڪريٽري رحيم شيخ، آبپاشي سيڪريٽري ظريف ڪيريو ۽ ٻين آفيسرن شرڪت ڪئي. سنڌ جي وڏي وزير سيد مراد علي شاھھ چيو تھ سکر بئراج جي ساڄي ڪناري واري علائقي کي پاڻي جي مسئلن لاءِ ڪم ڪيو ويو آهي، ساڄي ڪناري وارو علائقو 2094975 ايڪڙ زمين جي پاڻي جي ضرورت کي پورو ڪري ٿو. اجلاس کي آگاھي ڏيندي صوبائي وزير آبپاشي ڄام خان شورو چيو تھ بلوچستان ۾ 185,000 ايڪڙ زمين ساڄي ڪناري واري علائقي مان بھ آباد ٿئي ٿي. سيد مراد علي شاھھ چيو تھ دادو ڪئنال، رائس ڪينال ۽ نارٿ ويسٽ ڪينال سکر بئراج جي ساڄي پاسي کان نڪرندا آهن، ساڄي ڪناري تي زرعي زمين نه هئڻ جي شڪايت آهي. جنھن تي آبپاشي وزير ڄام خان شورو چيو تھ سکر بئراج وٽ اپ اسٽريم ۾ 121951 ۽ هيٺانهون 70041 ڪيوسڪ پاڻي موجود آهي، رائس ڪينال 100 ڪئنال کي پاڻي مھيا ٿئي ٿو، جڏھن تھ رائس ڪينال جو ڪمانڊ ايريا 4 ضلعن تي پکڙيل آهي، هن وقت رائس ڪينال ۾ 80 کان 89 سيڪڙو پاڻي مختص ڪيل حساب سان ڏنو پيو وڃي. ڄام خان شورو چيو تھ رائس ڪينال جي مختص 14355 ڪيوسڪ جي مقابلي ۾ 12800 ڪيوسڪ پاڻي ڏنو پيو وڃي، جيڪو 11 سيڪڙو جي گهٽتائي جي نمائندگي ڪري ٿو. سنڌ جي وڏي وزير کي بريفنگ ڏيندي سيڪريٽري آبپاشي، سنڌ ظريف کهڙو چيو تھ وارھ برانچ ۾ ضرورت مطابق 85 کان 90 سيڪڙو پاڻي مھيا ڪيو پيو وڃي، وارهه جو ڪمانڊ علائقو شڪارپور، لاڙڪاڻي ۽ قمبر شهدادڪوٽ تائين پکڙيل آهي، واھھ شاخ مان 47 ننڍن وڏن واهن کي پاڻي مھيا ٿيندو آھي، وارھھ شاخ ۾ پاڻي کوٽ جي ڪا به شڪايت ناهي. ھن چيو تھ دادو ڪئنال شهر کي 50 سيڪڙو پاڻي مھيا ٿي رھيو آھي. صوبائي وزير ڄام خان شورو ڪيو تھ دادو شهر ۾ پاڻي کوٽ سبب شهري سخت پريشاني کي منهن ڏئي رهيا آهن، دادو ڪئنال مان 60 ننڍا ۽ وڏا چينل نڪرن ٿا، دادو ڪئنال ۾ پاڻي جي کوٽ کي پورو ڪرڻ لاءِ پمپنگ اسٽيشن استعمال ڪئي پئي وڃي، اتر اولهه ڪئنال ۾ به 50 سيڪڙو پاڻي جي کوٽ موجود آهي. سنڌ جي وڏي وزير سيد مراد علي شاھھ آبپاشي کاتي کي نارٿ ويسٽ ڪئنال ۾ پاڻي جي کوٽ کي پورو ڪرڻ لاءِ ضروري قدم کڻڻ جي هدايت ڪئي. ھن چيو تھ اتر اولهه ڪينال 100 ننڍن ۽ وڏن واهن کي پاڻي فراهم ڪري ٿو، اتر اولهه ڪئنال جا ڪمانڊ ايريا ٽن ضلعن تي مشتمل آهن. صوبائي وزير ڄام خان شورو چيو ته نارٿ ويسٽ ڪينال جي زمينن کي روٽيشن پلان تحت پاڻي فراهم ڪيو پيو وڃي. سنڌ جي وڏي وزير آبپاشي کاتي کي ساڄي پاسي وارن علائقن ۾ پاڻي جي کوٽ کي پورو ڪرڻ جي هدايت ڪندي چيو تھ پاڻي جي کوٽ پوري نه ٿيڻ تي خريف جي فصل کي سخت نقصان ٿيندو.
